የሞጆ ደረቅ ወደብ ማስፋፊያ ፕሮጀክት ተመረቀ

በቻይናው የግንባታ ግዙፍ ኩባንያ China Civil Engineering Construction Corporation (CCECC) ተቋራጭነት የተከናወነው የሞጆ ደረቅ ወደብ ማስፋፊያ ፕሮጀክት በኢትዮጵያ ጠቅላይ ሚኒስትር ዐቢይ አህመድ ሐሙስ ዕለት በኦሮሚያ ክልል ሞጆ ከተማ ተመርቋል።

በምረቃ ሥነ-ሥርዓቱ ላይ ንግግር ያደረጉት ጠቅላይ ሚኒስትሩ፣ ኢትዮጵያ ባለፉት ጥቂት ዓመታት ፈጣን የማኅበራዊና ኢኮኖሚያዊ ዕድገት ማስመዝገቧን ገልጸው፣ በዚህ ዕድገት ውስጥ የሎጂስቲክስ ዘርፍ ወሳኝ ሚና እንደተጫወተ ጠቁመዋል።

ሆኖም ኢትዮጵያ ወደብ አልባ ሀገር በመሆኗ ከውጭ የሚገቡ ምርቶች የሎጂስቲክስ ወጪ አሁንም ከፍተኛ መሆኑን እና ይህም በገበያ ላይ የሚሸጡ ዕቃዎች ዋጋ እንዲጨምር እያደረገ መሆኑን አስረድተዋል።

ጠቅላይ ሚኒስትሩ የሞጆ ደረቅ ወደብ ማስፋፊያ ፕሮጀክት መጠናቀቁን በማድነቅ፣ ፕሮጀክቱ የሎጂስቲክስ ማዕከሉን አቅምና የሥራ ቅልጥፍና በከፍተኛ ሁኔታ እንደሚያሳድግ ገልጸዋል።

“በዓመት እስከ 1 ሚሊዮን የ20 ጫማ ኮንቴይነሮችን ለማስተናገድ የሚያስችል አቅም ያለው ሲሆን፣ የደረቅ ጅምላ ጭነቶችን በአገር ውስጥ ማሸግ እንዲቻል ያደርጋል። ይህም የውጭ ምንዛሬን ለመቆጠብና ለዜጎቻችን የሥራ ዕድል ለመፍጠር ያግዛል” ብለዋል ዐቢይ።

በቻይና ኤምባሲ በኢትዮጵያ የጊዜያዊ ጉዳይ አስፈጻሚ ሱን ሚንግሺ (Sun Mingxi) በበኩላቸው፣ የኢትዮ-ጅቡቲ የባቡር መስመር የBelt and Road Initiative (BRI) ዋና ዋና ፕሮጀክቶች አንዱ እንዲሁም ቻይናና ኢትዮጵያ በሁለትዮሽ ትብብር ያከናወኑት እጅግ ጥሩ ምሳሌ መሆኑን ገልጸዋል። የሞጆ ደረቅ ወደብም ከዚህ የባቡር መስመር ጋር የተቆራኘ አስፈላጊ የሎጂስቲክስ ተቋም መሆኑን ጠቁመዋል።

“ቻይናና ኢትዮጵያ በባቡር መስመሩ ላይ ይህንን ‘የብልጽግና ቀበቶ’ ለማስፋፋት በቅርበት እየሠሩ ናቸው። የዚህ ደረቅ ወደብ ማስፋፊያና ዘመናዊነት ለወደፊቱ የባቡር መስመሩን እና የኢትዮጵያን የወጪ ንግድ ዘርፍ ለማሳደግ አስተዋጽኦ ያደርጋል” ብለዋል ሱን።

የሞጆ ደረቅ ወደብ ከኢትዮጵያ ዋና ከተማ ከአዲስ አበባ በስተደቡብ ምሥራቅ በኩል በግምት 70 ኪሎ ሜትር ርቀት ላይ ይገኛል። የማስፋፊያና የማሻሻያ ፕሮጀክቱ በግምት 67.8 ሄክታር መሬት ላይ የተከናወነ ነው።